பிரிக்ஸ் மாநாடு-2024; இந்தியா-சீனா இடையே புதிய பாதையை திறக்கிறதா?..! பேராசிரியர் கே.ரீ.கணேசலிங்கம்.

அக்டோபர் 22-24, 2024ஆம் திகதிகளில ரஷ்சியாவின் கசானில் 16வது பிரிக்ஸ் மாநாடு நடைபெற்று முடிவடைந்துள்ளது. தற்போதைய புவிசார் அரசியல் நிலப்பரப்பில் குறிப்பிடத்தக்க பொருத்தத்தைக் கொண்டுள்ளது. வளர்ந்து வரும் பொருளாதாரங்கள் வேகமாக மாறிவரும் உலகில் தங்கள் செல்வாக்கை நிலைநாட்டுவதற்கு இது முக்கியமான தளமாக செயற்படுகின்றது. உலகின் கவனத்தை குவித்துள்ள தலைவர்களான ரஷ்சியாவின் அரச தலைவர் விளாடிமிர் புடின், சீனாவின் அரச தலைவர் ஷி ஜின்பிங் மற்றும் இந்தியாவின் அரசாங்க தலைவர் நரேந்திர மோடி ஆகியோர் ஒரே அரங்கில் சந்தித்துள்ளதுடன், இருதரப்பு சந்திப்புக்களையும் நிகழ்த்தியுள்ளார். கடந்த ஜூலை மாதத்திற்கு பின்னர் குறுகிய கால இடைவெளியில் விளாடிமிர் புடின் மற்றும் நரேந்திர மோடி இருவருக்குமிடையிலான சந்திப்பு இடம்பெற்றுள்ளது. அதேவேளை ஷி ஜின்பிங் மற்றும் நரேந்திர மோடி ஆகிய இருவருக்குமிடையிலான இருதரப்பு கலந்துரையாடல் ஐந்து ஆண்டுகளுக்கு பின்னர், பிரிக்ஸ் மாநாட்டையொட்டி ரஷ்சியாவின் கசானில் அக்டோபர்-23அன்று நடைபெற்றிருந்தது. 2020ஆம் ஆண்டு ஜூன் மாதம் கல்வானில் பல உயிரிழப்புகளுக்கு வழிவகுத்த இராணுவ மோதலுக்கு சில மாதங்களுக்கு முன்பு, 2019ஆம் ஆண்டு தமிழ்நாட்டின் மகாபலிபுரத்தில் மோடி ஜின்பிங்குடன் கடைசியாக உரையாடியிருந்தமை குறிப்பிடத்தக்கது.

இருபத்தொராம் நூற்றாண்டின் உலக ஒழுங்கின் மாற்றங்களில், இந்தியா மற்றும் சீனா சர்வதேச அரசியல் கவனத்தை குவித்துள்ளது. குறிப்பாக இருபத்தொராம் நூற்றாண்டு ஆசிய நூற்றாண்டு என்ற வாதத்தில், இந்திய மற்றும் சீனா சார்ந்த கவனக்குவிப்பு, 1988ஆம் ஆண்டு சீன ஜனாதிபதி டெங் சியோபிங் மற்றும் இந்திய பிரதமர் ராஜீவ் காந்தியின் சந்திப்பினை தொடர்ந்து முதன்மை பெற்றிருந்தது. அமெரிக்காவின் காங்கிரஸிலும் அன்றைய காலப்பகுதியில் இவ்விடயம் உரையாடப்பட்டுள்ளது. இதனை தொடர்ந்து சீனா மற்றும் இந்தியாவின் சர்வதேச அரசியல் நுழைவுகள் கவனக்குவிப்பை பெறலாயிற்று. அதிலும் இரு தரப்பு தலைவர்களினது சந்திப்புக்களும் சர்வதேச ஊடகங்களின் தலைப்பு செய்திகளாகவும், அய்வாளர்களின் ஆய்வுக்குரிய விடயங்களாகவும் மாறியிருந்தன. எனினும் சீனா மற்றும் இந்தியாவிற்கு இடையிலான எல்லைப்பிரச்சினை இரு தரப்பு உறவினையும் நிர்ணயம் செய்வதில் குழப்பகரமான சூழலை உருவாக்கியிருந்தது. 2020ஆம் ஆண்டு சீன-இந்திய எல்லைப்பகுதியில் ஏற்பட்ட பதட்டங்கள், இரு தரப்பு உறவின் நெருடலை உருவாக்கியிருந்தது. கடந்த நான்கு ஆண்டுகளிலும் பிரிக்ஸ் மாநாடு, ஜி-07 மாநாடு, ஜி-20 மாநாடு மற்றும் ஷங்காய் மாநாடு போன்ற பொதுவான அரங்குகளில் சீன மற்றும் இந்திய தலைவர்கள் கலந்து கொண்டிருந்த போதிலும், இரு தரப்பு சந்திப்புக்களை தவிர்த்திருந்தனர்.

இந்நிலையிலேயே ரஷ்சியாவில் நடைபெற்று முடிந்த 2024ஆம் ஆண்டுக்கான பிரிக்ஸ் மாநாட்டின் ஒரு பகுதியாக, சீன மற்றும் இந்திய தலைவர்களின் இரு தரப்பு சந்திப்பு நடைபெற்றுள்ளது. இச்சந்திப்பின் உரையாடல் தொகுப்பு இரு தரப்புக்களிடையேயான சுமுகமான அரசியல் திருப்பத்தை வெளிப்படுத்தியுள்ளது. சீன-இந்திய தலைவர்களின் சந்திப்பில் இரு பகுதியின் எல்லையான கிழக்கு லடாக்கில் உள்ள உண்மையான கட்டுப்பாட்டுக் கோடு (LAC) வழியாக வழக்கமான ரோந்துப் பணியை மீண்டும் தொடங்க இரு நாடுகளும் உடன்பாட்டை எட்டியதாக அறிய முடிகின்றது. இது இருதரப்பு உறவில் முன்னேற்றகரமான பகுதியாகும். இரு தரப்பு உறவு நெருக்குவாரத்துக்குள் நுழைந்த பகுதியிலிருந்து தளர்வுடன், புதிய உரையாடலை ஆரம்பித்திருப்பது நம்பிக்கையான பக்கங்களை வெளிப்படுத்தியுள்ளது. லடாக்கில் உள்ள உண்மையான கட்டுப்பாட்டுக் கோட்டின் சில புள்ளிகளில் இரு நாடுகளும் விலக ஒப்புக்கொண்ட பிறகு, ரஷ்சியாவில் நடந்த பிரிக்ஸ் உச்சி மாநாட்டில் பிரதமர் நரேந்திர மோடி மற்றும் சீன ஜனாதிபதி ஷி ஜின்பிங் இடையே சந்திப்பு ஒரு குறிப்பிடத்தக்க இராஜதந்திர நிகழ்வைக் குறித்தது. பகைமையை தற்காலிகமாக நிறுத்துவதை உள்ளடக்கிய இந்த ஒப்பந்தம் ஒரு நேரான நடவடிக்கையாகவே அவதானிக்கப்படுகின்றது. ஆனால் இது அர்த்தமுள்ள நிலையான தளர்வுக்கு வழிவகுக்குமா என்பதில் இந்திய அரசியல் ஆய்வாளர்களிடம் அதிக சந்தேகங்கள் காணப்படுகின்றது. இதனை ஆழமாக நோக்குதல் அவசியமாகின்றது.

முதலாவது, இந்திய-சீன தலைவர்களின் சந்திப்பும் சுமுகமான முன்னேற்றமும் இந்திய நோக்கு நிலையில் அமெரிக்காவிற்கான எதிர்வினையாக அவதானிக்கப்படுகின்றது. சமகாலத்தில் இந்திய-அமெரிக்க உறவில் உள்ளார்ந்த நெருடல்கள் அதிகரிக்கப்பட்டுள்ளதை அரசியல் நிகழ்வுகள் உறுதி செய்கின்றது. குறிப்பாக கனடா-இந்திய இராஜதந்திர முறுகலில் அமெரிக்காவின் நிலைப்பாடுகள் அதனை உறுதி செய்கின்றது. கடந்த கால அனுபவங்களில் கனடா போன்ற நாடுகள் பல அமெரிக்காவின் பினாமி அரசியலையே தமது வெளியுறவுக்கொள்கைளில் பேணி வந்துள்ளனர். இந்த பின்னணியிலேயே கனடா-இந்திய இராஜதந்திர நெருக்கடியில் கனடாவின் பின்னணியில் அமெரிக்காவின் ஆர்வம் சந்தேகிக்கப்படுகின்றது. ஆரம்பத்தில் கனடாவில் இயங்கும் கலிஸ்தான் செயற்பாட்டு தலைவரின் மரணத்தில் இந்தியாவின் ஈடுபாட்டை அமெரிக்க புலனாய்வே கனடாவிற்கு வழங்கியிருந்ததாக செய்திகள் வெளியாகியிருந்தன. இந்த பின்னணியிலேயே அமெரிக்காவிற்கு சவால் செய்யும் வகையில் ஆசியாவின் வெளியுறவுக்கொள்கையில் இந்தியா தனித்துவமான பாதையை சீரமைத்து கொள்வதனை மூன்று நிகழ்வுகள் உறுதி செய்கின்றது.

ஒன்று, இந்தியா ரஷ்சியாவிற்கு அளிக்கும் முக்கியத்துவம். ரஷ்சியா-உக்ரைன் போரை காரணப்படுத்தி, ரஷ்சியா மீதான பொருளாதார தடைகளை அமெரிக்கா மற்றும் அதன் நட்பு ஐரோப்பிய நாடுகள் விதித்துள்ளன. இவ்வாறான சூழலில் கடந்த ஜூலை மாதம் இந்திய பிரதமர் நரேந்திர மோடி ரஷ்சியாவிற்கு விஜயம் மேற்கொண்டிருந்தார். தற்போது குறுகிய கால இடைவெளியில் மீளவும் அக்டோபரில் பிரிக்ஸ் மாநாட்டிற்காக ரஷ்சியாவிற்கு விஜயம் செய்துள்ளார். இது ரஷ்சியா சர்வதேச அரசியலில் தனது அங்கீகாரத்தை உறுதிப்படுத்தும் இராஜதந்திர நகர்வாகும். அதற்கான ஒத்துழைப்பை இந்தியா வழங்குவது, அமெரிக்காவினை நேரடியாக சவாலுக்குட்படுத்துவதாக அமைகின்றது.

இரண்டு, சீன தலைவருடனான சந்திப்பும், இருதரப்பு உறவை புதுப்பித்தலும். பனிப்போர் அரசியலில் அமெரிக்காவின் மேலாதிக்கத்திற்கு ரஷ்சியா தலைமையிலான சோவியத் ஒன்றியம் ஏற்படுத்திய சவாலுக்கு அதிகமாகவே, தற்போதைய உலக ஒழுங்கில் அமெரிக்காவின் மேலாதிக்கத்திற்கு சீனாவின் மென் தாக்குதல் அமைகின்றது. இந்நிலையில் இரு பெரிய பொருளாதார சக்திகளும் எல்லை முரண்பாட்டை இடைநிறுத்தி, சுமுகமான நிலைக்கு செல்வது அமெரிக்காவிற்கு எச்சரிக்கையானதாகவே அமைகின்றது. The Federal பத்திரிகையின் நிர்வாக ஆசிரியர் கே.தக்ஷிணாமூர்த்தி, ‘மேற்கத்தேய நாடுகளின் சமீபத்திய அழுத்தங்களுக்கு பதிலளிக்கும் விதமாக சீனாவுடன் சூடுபிடிப்பதன் மூலம் இந்தியா தனது பந்தயத்தை தடுக்கக்கூடும் என்று பரிந்துரைத்தது’ எனத் தெரிவித்துள்ளார்.

மூன்று, அமெரிக்காவின் அரசியல் யுக்தி அணிகளை உருவாக்குவதனூடான போட்டியாளர்களை கட்டுப்பத்துவதாக அமைந்து வந்துள்ளது. சீனாவை எதிர்கொள்வதற்கு இந்தோ-பசுபிக் தந்திரோபாயத்தை அமெரிக்கா கையாள்கின்றது. இதனூடாக இந்தியாவை மையப்படுத்தி குவாட் மற்றும் மேற்காசிய குவாட் என்ற கட்டமைப்பை உருவாக்கியிருந்தது. எனினும் குவாட் போதிய செயற்பாட்டு வேகத்தை வெளிப்படுத்தியிருக்கவில்லை. எனினும் அமெரிக்காவின் போட்டி அரசுகளான ரஷ்சியா மற்றும் சீனாவுடன் இந்தியா கூட்டுச்சேர்ந்து இயங்கும் பிரிக்ஸ் அமைப்பின் நிர்ணயக்கத்தக்க வளர்ச்சி அமெரிக்காவிற்கான பதிலாகவே அமையக்கூடியதாகும்.

இரண்டாவது, இந்திய-சீன உறவு நிலை இருதரப்பு உள்ளடக்கங்களில், தலைவர்களின் சந்திப்பு பலவீனமான அமைதியாகவே விபரிக்கப்படுகின்றது. இரு தரப்பு தலைவர்களின் சந்திப்பு எல்லைப் பிரச்சினையின் ஒரு பகுதியை இடைநிறுத்தியுள்ளது. எனினும் பதட்டங்களை முழுமையாக அகற்றுவதற்கு தொடர்ச்சியான கலந்துரையாடல்கள் அவசியப்படுகின்றது. 2019ஆம் ஆண்டு சீன ஜனாதிபதி இந்தியாவிற்கு விஜயம் செய்தமை, இரு தரப்பு சுமுகமான உறவை வெளிப்படுத்தியிருந்து. எனினும் ஓராண்டு கால இடைவெளியில் கல்வான் பகுதியில் இடம்பெற்ற மோதல், இருதரப்பு உறவை மீள நெருக்கடிக்குள் தள்ளியிருந்தமை குறிப்பிடத்தக்கது. கடந்த கால அனுபவங்களின் பிரதிபலிப்புக்களுடனேயே அரசியலை அணுகுவது பாதுகாப்பானதாகும். அதனூடாகவே எதிர்காலத்தை பலமாக உறுதிப்படுத்தக்கூடியதாக அமையும். பொருளாதாரரீதியாக, வர்த்தக பங்காளியாக இந்தியா மீது சீனாவின் ஆர்வம் வலுவாக உள்ளது. உறவில் விரிசல் இருந்தாலும், இரு நாடுகளுக்கிடையிலான வர்த்தகம் உறுதியானதாக உள்ளது. இதனூடாக இருதரப்பு சந்திப்புக்களை உரையாடல்களை மேலும் பலப்படுத்துவதனூடாக இந்திய-சீன உறவின் அமைதியை பலப்படுத்தக்கூடியதாக அமையலாம்.

எனவே பிரிக்ஸ் மாநாட்டை மையப்படுத்தி, ரஷ்சியாவில் நடைபெற்ற சீன-இந்திய தலைவர்களின் சந்திப்பு முழுமையான மூலோபாய நகர்வாகவே அமைகின்றது. குறிப்பாக அமெரிக்காவிற்கு பதிலளிப்பதாக இச்சந்திப்பு வடிவமைக்கப்பட்டுள்ளது. ரஷ்சியாவில் சந்திப்பு; பிரிக்ஸ் மாநாடு; சுமுகமான கலந்துரையாடலுக்கான உள்ளடக்கம் என தெளிவாக அமெரிக்காவிற்கு எச்சரிக்கை செய்யும் முனைப்புக்களே முதன்மை பெற்றுள்ளது. புவிசார் அரசியல் நிலப்பரப்பு தொடர்ந்து மாறிக்கொண்டே இருக்கிறது. உலக வல்லரசுகளான அமெரிக்கா, ரஷ்சியா மற்றும் சீனா ஆகிய நாடுகளிடையே இந்தியா நுட்பமான சமநிலையான இராஜதந்திர செயற்பாட்டை நகர்த்துவதனையே அரசியல் அவதானிகள் சுட்டிக்காட்டுகின்றனர்.

-பேராசிரியர் கே.ரீ.கணேசலிங்கம்-

(நன்றி: தினகரன்)